Aammaarluta oqassaagut, Pineqartilluta ilaassaagut
Kalaallit Nunaannik tiguaanissaq pillugu sapaatit akunnerini kingullerni USA-mi præsidentip oqaasii eqqarsaatigalugit Kalaallit Nunaata nioqqutissaannginnera Tiliumit erseqqissassallugu kissaatigaarput.
Kalaallit Nunaanni inuit innarluutillit tungaanniit oqallinneq una nunarsuarmi tamarmi naalakkersuinermik ingerlatsinermut taamaallaat tunnganngilaq, aammali tunngaviusumik inuit pisinnaatitaaffii, toqqissisimaneq aamma inuiaqatigiinni nammineq inuunermik ilusilersuinissamut pisinnaatitaaffiit pineqarmata.
Nunarsuaq tamakkerlugu nammineq aalajangiisinnaatitaaneq atuuppoq
Naalagaaffiit Peqatigiivisa Inuit innarluutillit pillugit Isumaqatigiissutaat Kalaallit Nunaannit akuerineqartoq malillugu inuit ataqqinassusaannik ataasiakkaatullu nammineq aalajangiisinnaanerannik, tassunga ilanngullugit nammineq toqqakkamik aalajangiisinnaanermut tunngatillugu kiffaanngissuseqarnermik ataqqinninnissaq pingaarnerpaavoq. Akuersissuteqarnani nunamik nunallu inuinik tiguaanissamik pisinissamilluunniit oqalunneq nammineq aalajangiisinnaatitaanermut tunngatillugu toqqaannartumik saassussineruvoq.
Inuit innarluutillit isumaat malillugu nammineq aalajangiisinnaaneq inuulluarniutaanngilaq; ataqqinartumilli inuuneqarnissamut pisariaqarluni. Inuit innarluutillit nammineq inuiaqatigiitsinni tamakkiisumik ilaatinneqarnissamut tikikkuminassutsimullu tunngatillugu ilungersuuteqarnerat Tiliumit erseqqissarneqakkajuttarpoq. Siunissamut tunngatillugu politikkikkut nalorninartorsiorneq kiisalu paasissutissanik pissarsisinnaannginneq innuttaasunut inooqatigiinnikkut patajaatsumik atugaqarnissamut pisinnaatitaaffinnillu tunngaveqartumik tapersersorneqarnissamik pisariaqartitsereersunut, pisariaqanngitsumik annilaangalersitsisarput.
Assigiinngisitsinissamut nalorninartorsiorfiusumullu illersorneqarneq
Innuttaasut tamarmik inuunermi atugassarititaasut tungaatigut akuliuffigineqarnissamut tunngatillugu illersorneqarnissaat inuit pisinnaatitaaffiinit qulakkeerneqarpoq. Nammineq inuuneqarnissamut aamma inuiaqatigiinnut ilaatinneqarnissamut pisinnaatitaaffik innarluutillit pillugit isumaqatigiissummi artikeli 19-imi erseqqissarneqarpoq.
Nunatta nunaqqatittalu naalagaaffiit pissaanilissuarnit sakkussatut atorneqarnissaat akuerisinnaanngilarput. Patajaassuseq eqqarsaatigalugu ikiuutit, paasissutissat aamma ornigulluni tikinneqarsinnaasut inunnut innarluutilinnut pingaaruteqarput. Pisinnaatitaaffiit taakku ukiuni qulikkuutaani ilungersuuteqarnikkut anguneqarsimapput aamma nunat tamalaat akornani niuernermi atorneqassanngilluinnarput aammalu nammineq naalakkersuisutsinnit soqutiginngitsuusaarneqassanngillat.
Taamaammat inissisimanerput pillugu attaveqaqatigiinnerit tamaasa eqqarsaatigalugit Kalaallit Nunaanni innuttaasunut tamanut paasissutissiisoqartarnissaa Tiliumit sakkortuumik innersuussutigerusupparput. Naalakkersuisut tusagassiorfinnik katersortitsineranni tamani ussersorluni oqaluttaasoqartarnissaa matumani aamma ilaavoq.
Kalaallit Nunaanni inuit innarluutillit aporfinnik nalaattagaat pillugit Tilioq ingerlaavartumik uppernarsaasarpoq. Kalaallit Nunaanni innuttaasut oqartussaaqataanerat tunngavigalugu aqunneqarnitsinni qinikkat, aporfinnik taakkuninnga nungusaanissamik sulissuteqartut, nunani tamalaani inuiaqatigiinnit ataqqineqarnissaat kajumissaarutigaarput. Pinngitsaalisamik politikkikkut allannguisoqarpat tamanna taamaallaat ataatsimut nammineq aalajangiisinnaatitaanitsinnik innarliinerussanngilaq, aammali inunnut sanngiinnerpaamik inissisimasunut tunngatillugu anguneqareersimasut eqqarsaatigalugit kinguariaallattoqarsinnaanera aarlerinarpoq.
Ataqqinninneq
Aalajangiinerit tamarmik Kalaallit Nunaata siunissaanut sunniuteqartussat eqqarsaatigalugit inuit innarluutillit pisinnaatitaaffiit aalajangersarneqarsimasut ataqqineqassapput. Namminersorneq pillugu inatsit kiisalu Nunat inoqqaavisa Pisinnaatitaaffiit pillugit Naalagaaffiit Peqatigiit Nalunaarutaanni pisinnaatitaaffiit aalajangersarneqarsimasut naapertorlugit Kalaallit Nunaata nunatut nammineq aalajangiisinnaatitaaneranik ataqqinnittoqassaaq.
Siunissatsinnut isumannaassutsimullu tunngatillugu apeqqutini tamani inunnik innarluutilinnik ilaatitsinissaq Tiliumit erseqqissarparput. Kalaallit Nunaat angerlarsimaffigaarput, aamma innuttaasut tamarmik toqqissisimanissamut paasissutissanillu pissarsinissamut tunngatillugu naligiimmik pisinnaatitaaffeqarput. Soorlu oqaatigisaqattaartaripput: Pineqartilluta ilaassaagut.
