Ækvivalenten

Tiliup iliuusissatut pilersaarutaa

Suliassat

Tiliup inuit innarluutillit pisinnaatitaaffiisa eqqortinneqarnissaat suliniutigaa, taamaalillutik allat naligalugit ataqqinartumik inuuneqarniassammata.

Tilioq peqataatitsinermik suleriuseqarluni inuit innarluutillit isumaasa tusarneqarnissaat qulakkeerniarlugu inuiaqatigiinni oqallinnermi inuit innarluutillit atugaat oqariartuutigisarpai.

Tilioq inuit innarluutillit pillugit politikkiliornermi, kommunini nunalu tamakkerlugu, suleqataarusuppoq, soorlu aamma ilisimasanik suliaqartuullunilu katersiffiuniartoq, inuillu innarluutillit pisinnaatitaaffii tamatigoortunngortinneqarnissaannut nuna tamakkerlugu kommuninilumi politikkiliortoqarnerani eqqarsaatigineqartarnissaat qulakkeerumavai.

 

Takorluugaq

Inuiaqatigiit Naalagaaffiit Peqatigiivisa Inuit Innarluutillit Pisinnaatitaaffii pillugit Isumaqatigiissutaanik eqquutsitsisoq.

Naleqartitat

Tilioq inuit innarluutillit inuiaqatigiinni atugaannik pisinnaatitaaffiinillu siuarsaanermini peqataatitserusuppoq, ataqqinnikkusuppoq tatiginartoorusullunilu.

Kalaallit Nunaanni, kalaallisut, kalaallinik, kalaallinut sullissivugut

Inuit innarluutillit, sulianik suliaqartut soqutigisaqartullu suliamut attuumasuteqartut ulluinnarni ajortorsiutigisaminnik isumaasa tusarnissaat pingaartipparput, taamaalilluni ilisimasanik assigiinngiiaartunik tunngaveqartitsisoqalerniassammat. Inuit innarluutillit isumaasa inuiaqatigiinni oqallinnermi tusarneqarnissaat qulakkeerniarlugu inuit innarluutillit peqataatinneqarnissaatsuleqatiginissaallu pingaartipparput.

Inuit innarluutillit atugaannik pisinnaatitaaffiinillu ilisimasaqarneq allannguinissamut tunngaviuvoq. Tiliumit nalunaarutitta uppernartuunissaat pingaartipparput, taamaammallu ilisimasat tunngavigalugit suleriuseqarnissaq suliatsinni tamani malittarissavarput.

Ataqqinninneq Tiliup sulinerani marlunnik isumaqarpoq. Inunnut ataasiakkaanut ataqqinninneq kikkullu tamarmik inuiaqatigiinnut taperseeqataasinnaanerannik upperinninneq aamma inuiaqatigiinnik avatangiisigisatsinnik suleqateqarnitsinni attaveqartarnitsinnilu ataqqinnilluni suleriaaseqarneq. Inuit ataasiakkaat inuiaqatigiillu ataqqinnilluta naapittassavagut.

Iliuusissatut pilersaaruteqarfiit ukiut 2025-2027

Ataani atuarsinnaavat Tiliup piffissami 2025-imiit 2027-mut periusissiaa, Inuit Innarluutilinnut Oqaaseqartartutut atorfimmut nutaamik atorfinitsitsisoqarnissaa peqatigalugu 2028-mi nutarterneqartussaq.

Sammisaqarnermi isiginiagassat

Sunniuteqarneruneq peqataanerlu:


Inuiqatigiit innuttaasut innarluutillit qanigisaasalu tamarmik ataatsimooqatigiiffigisaat, tusarneqarfigisaat aammalu aalajangiisarnerni sunniuteqarfigisaat Tiliumit angorusupparput. Tamanna isumaqarpoq demokratiskiusumik peqataatitsinissaq sulissutigissagipput, pisortaniinnaanngitsoq aammali Tiliortut.


Piffissami uani Tiliup sulissutigissavai:

 

  • Naalakkersuisut Inatsisartullu kaammattussallugit Kalaallit Nunaanni inuit innarluutillit peqatigiiffii aningaasanut inatsimmut aalajangersimasumik ukiumoortumik aningaasaliiffigineqartarlutik ilanngunneqartarnissaat.

 

  • Inuit innarluutillit peqatigiiffiinik ukiumut minnerpaamik ataasiaq ataatsimeeqateqartarneq, taamaalilluni peqatigiiffiit sulinitsinnut pitsaanerusumik sunniuteqarsinnaaniassammata, Tiliup aamma peqatigiiffiit pisariaqartitaat aallaavigalugit sulinissani qulakkeersinnaassammagu.

 

  • Sulinitsinni tamatigut innuttaasunik peqataatitsinissaq, peqataatitsinermilu isumannaatsumik ingerlatseriaatsinik pilersitsineq. Tamanna ass. tassaasinnaavoq pitsaanerusumik isumannaallisaanermik suliniuteqarneq imal. innuttaasut suliniutinut/aaqqissuussanut peqataatinneqarnissaannut piumasaqaatit.

 

  • Inuit innarluutillit suliassaqarfiisa iluani inuiaqatigiinnit aallaaveqartumik allanngortitsinissamut periarfissanik pilersitsineq.

 

  • Inuiaqatigiit politikkikkut suliaqarnermut aamma suliassaqarfimmut peqataatinneqarnissaat pillugu politikkikkut pisussaaffik timitaliisumik piviusunngortinneqarnissaa qulakkeerlugu sulineq, uani immikkut inuit innarluutillit suliassaqarfiisa iluani.

 

  • Inuit innarluutillit pillugit suliassaqarfimmut suliffeqarfiit suleqatitut ilanngunneqarnissaat.

Tunngaviusumik ilisimasat pitsaanerusut:


Kalaallit Nunaat ilisimatusarnikkut pisuunerusoq anguniarparput. Takorluugaraarput inuiaqatigiit ilisimasat uppernarsaatillu tunngavigalugit aalajangiisartut sulisartullu, aammalu inuiaqatigiit tamarmik ilisimasat taakku pillugit ilinniartinneqarsimasut. Ilisimasallu tamarmik tamakkiisumik tamanik pissarsiarineqarsinnaasariaqarlutik.


Piffissami uani Tiliup sulissutigissavai:

 

  • Nunatsinni tunngaviusumik paasissutissanik pitsaanerusunik pilersitsinissaq.

 

  • Pisortat paasissutissanik pitsaanerusunik tamakkiinerusunillu pilersitsisinnaanerat qulakkeerlugu sulineq.

 

  • Sumiiffinni aaqqissutinik tulluarsakkanik suleriaaseqartarnissaq.

 

  • Attaveqaqatigiinnermut periuseq siammasinnerusoq pitsaanerusorlu eqquutsinniarlugu sulineq, inuit sumiiffiillu amerlanerusut tikissinnaallugit.

 

  • Sumiiffinni iliuuseqartunut tunngasunik ilisimasanik amerlanerusunik pilersitsinissaq sulissutigineqassaaq.

 

  • Isumat pigileriikkat allanngortinnissaannut aammalu inuiaqatigiinni inissaqatitsisumik isiginnittaaseqarnissamut sulineq.

 

  • Sumiiffinni ilisimasat suliatsinnut ileqqussaasumik, isumannaatsumik ataqqinnittumillu ilanngunneqarnissaat.

Aaqqissuussat ingerlatseriaatsillu pitsaanerusut, naligiissitaaneq aamma inuit pisinnaatitaaffii tunngavigalugit:


Kalaallit Nunaanni inuiaqatigiit innuttaasut aallaavigalugit aaqqissuussaasoq angorusupparput. Aaqqissuussaanermi inuit innarluutillit qanigisaasalu inissaqartinneqarnissaat takorluugaraarput. Aporfiit piiarneqarnissaat inuit innarluutillit innuttaasut allatulli naligiimmik inuuneqarsinnaaniassammata. Suliffeqarfiit toqqissisimanartut, atoruminarsakkat, ineriartortitsinissamut periarfissanik pilersitsisut angorusuppagut. Aamma tamakku periusissat inuiaqatigiinni atuutinneqarnissaat anguniarparput.

 

Piffissami uani Tiliup sulissutigissavai:

 

  • Inatsisitigut isumannaallisaanermik inatsisillu pitsaanerusumik atuutilersinneqarnissaannik sulineq.

 

  • Tiliumi suliffimmi pissutsit pitsaasuuninssaat qulakkeerniarlugu sulineq.

 

  • Tilioq piginnaaneqarluartoq qulakkeerniarlugu sulineq.

 

  • Politikkikkut oqartussat inuit pisinnaatitaaffiinik tunngaveqartumik, inissaqartitsisumik aammalu inuiaqatigiinni tamakkiisumik isiginnittumik suleriaaseqarnissaannut sunniiniarnissaq.

 

  • Suliffeqarfinni inuit innarluutillit inissaqartinneqarnissaannut aammalu kikkut tamarmik peqataaffigisinnaasaannik sullissisinnaanissaannut suleriaaseqarnissaamut sunniiniarnissaq.