Ækvivalenten

Inuit Innarluutillit Oqaaseqartartuata suliassai

Inuit Innarluutillit Oqaaseqartartuata suliassaraa Naalagaaffiit Peqatigiivisa Inuit innarluutillit pillugit Isumaqatigiissutaat malillugu inuit innarluutillit inuiaqatigiinni soqutigisaat isumannaatsumik siuarsaasumillu aallunnissaat. Inuit Innarluutillit Oqaaseqartartuata suliassaai pingaarnerit ukuupput:

  1. Inuit innarluutillit pisinnaatitaaffiinik aamma maalaarutaanik aqqutissaannik siunnersorlugit aqqutissiuullugillu.

  2. Pisortatigut aamma namminerisamik sulliviutillit siunnersorlugit aqqutissiuullugillu.

  3. Naalagaaffiit Peqatigiivisa inuit innarluutillit pillugit Isumaqatigiissutaat naapertorlugu inatsisitigut isumannaatsumik inuit innarluutillit sullinneqarnerat qulakkiissallugu

  4. Pissutsit inunnut innarluutilinnut tunngasut nalilersussallugit

  5. Nunatsinni inunnut innarluutilinnut tunngasunik paasissutissanik katersineq ingerlatitseqqiinerlu

  6. Inuit innarluutillit atugarisaat nakussassarlugit suliniutinik siunnersuusiorneq

  7. Nunatsinni innarluutillit peqatigiiffii suleqatigalugit inuit innarluutillit Kalaallit Nunaanni atugaat siuarsarneqarnissaat qularnaarneqarnissaallu

Inuit Innarluutillit Oqaaseqartartuat politikkikkut attuumassuteqarfeqanngilaq, inuit ataasiakkaat pillugit aalajangiisinnaatitaanngilaq, oqaaseqaateqarsinnaatitaallunili.

Inuit Innarluutillit Oqaaseqartartuat Qivioq Løvstrøm

Qivioq Løvstrømi 2025-miit 2027-ip tungaanut Inuit Innarluutillit Oqaaseqartartuatut inissisimavoq. Qiviup pingaartippaa ilisimasat katersorneqareersimasut aallaavigalugit inuiaqatigiinni inuttut innarluutilittatta atugaat pitsanngorsarneqaqqullugit inuiaqatigiinnilu peqataanerat annertusarneqaqqullugu inuiaqatigiinni ilisimasat, paasisitsiniaanikkut oqallittarnerillu aqqutigalugit annertusarneqassasut siunnerfeqarpoq:

- Inuit innarluutillit inuiaqatigiinni saqqumilaarluarlutik akuulluarlutillu peqataanissaat pingaartippara, tamannalu iluatsilluarsinnaassappat inuiaqatigiinni inuit innarluutillit pillugit ilisimasat annertusarneqassasut pingaartippara, ilaatigut fjernsyni, radio, internetsilu atorluarlugit ilisimasat annertusaannarnagit, inuilli innarluutillit oqallinnermi peqataalluarnissaat aqqutissiuukkusuppara. Tamanna ilaatigut anguneqassaaq suliap Kalaallit Nunaanni aallaaveqartinneratigut, oqaatsivut atorlugit, nunaqqatigut suleqatigalugillu sullinneratigut. Pineqartillutami ilaasuassagatta.  

Inunnut innarluutilinnut illersuisoq Qivioq Løvstrøm

Inuit Innarluutillit  Oqaaseqartartuat Anja Hynne Nielsen

Anja Hynne Nielsen Inuit Innarluutillit Oqaaseqartatutut decemberip 1-ni 2021-miit aallartippoq 31. novemberip 2024 tungaanut.

Anjap anguniarusuppaa, inuiaqatigiit Naalagaaffiit Peqatigiit isumaqatigiissutaannik naapertuillutik ingerlatsinissaat. inuttut misilittakkani, ilisimasani isumassarsianilu naapertorlugit pitsaasumik ingerlatsiumavoq, nutaanillu periuseqarnikkut annerusumik paasisimasaqalerusulluni.

Inuit pissutsimikkut qanorluunniit piginnaanikillisimasut assigiinngiiaassuseqarnerat pillugu inuiaqatigiinni paasineqarlutik akuerineqarlutillu peqataativinneqalernissaat anguniarusuppaa. Inuit innarluutillit pillugit politikkiliornermi, kommunini nunalu tamakkerlugu, suleqataarusuppoq, soorlu aamma ilisimasanik suliaqartuullunilu katersiffiuniartoq, inuillu innarluutillit pisinnaatitaaffii tamatigoortunngortinneqarnissaannut nuna tamakkerlugu kommuninilumi politikkiliortoqarnerani eqqarsaatigineqartarnissaat qulakkeerumavai.

Inunnut innarluutilinnut illersuisoq Anja Hynne Nielsen

Inuit Innarluutillit Oqaaseqartartuat siulleq Christina Johnsen

Christina Johnsen Kalaallit Nunaanni Inuit Innarluutillit Oqaaseqartartuisa siullersaat 1.november 2017-imiit 31.maj 2021-imut Oqaaseqartartutut atorfeqarpoq.

Inuit Innarluutillit Oqaaseqartartuattut sulinermini pingaartilluinnarsimavaa, innuttaasut inatsisitigut innarlitsaalisaanerata nukittorserneqarnissaat, kikkut tamarmillu qanorluunniit inooqataanermikkut aningaasaqarnermikkut politikkimik tunuliaqutaqarnermikkut, peqqinnermikkut inissisimagaluarunik naapertuilluartumik iliorfigineqarnissaat inuillu ataasiakkaat ataqqineqarnissaat. Ilungersuutaasalu ilagaat Kalaallit Nunaanni innuttaasut pisinnaatitaaffimminnik ilisimasaqarlualernissaat.

Inunnut innarluutilinnut illersuisoq siulleq Christina Johnsen

Inuit Innarluutillit Oqaaseqartartuat pillugu inatsit Inuit innarluutillit illersuisuat pillugu Inatsisartut inatsisaat nr. 1, 29. maj 2017-imeersoq Namminersorlutik Oqartussat nittartagaanni sukumiinerusumik atuarneqarsinnaavoq uanilu aamma pdf-itut aaneqarsinnaalluni.

Tamassuma saniatigut aamma Inuit Innarluutillit Oqaaseqartartuat pillugu Inatsisartut inatsisaat pillugu Namminersorlutik Oqartussat nalunaarutaat Namminersorlutik Oqartussat nittartagaanni sukumiinerusumik atuarneqarsinnaavoq pdf-itullu aamma aaneqarsinnaalluni.