Qinikkat innarluuteqarneq sammivaat

Kalaallit Nunatsinni qinikkat ukiumoortumik Naalakkersuinikkut Ataqatigiissaarisoqatigiit PKG innarluutillit pillugit suliassaqarfik pillugu ullup affaani eqqartuinissaminnut ukkataqarniarmata Innarluutillillu pillugit oqaaseqartartoq pilersaarusiornerminni qaaqqusimammassuk alloriarneq annertuvoq pingaaruteqartoq. Innuttaasut marluk ullumikkut Kalaallit Nunatsinni inuit innarluutillit pillugit atugarisaat saqqummiuppaat– Niels Skift inuusuttuulluni aanaartooreernerup kingorna aaqqissuussaanermut unamminartorsiorsimaninini pillugu oqaluttuarpoq. Katrine Skade ukiuni arlalinni meeqqami piginnaanikillisimasoq ikiorserneqarnissaanut sorsuttuarsimanini kiserliortarsimaninilu oqaluttuaraa. Innarluutillit pillugit oqaaseqartartutut sullissinermi ajornartorsiutit aaqqiissutaasinnaasullu saqqummiiffigaakka. Pingaarnertut oqaatiginiakkakka makkuupput, tassalu Kalaallit Nunaat:

Inuit innarluutillit atugarisaat pitsanngorsarniarneranit inuit innarluutillit inuiaqatigiitsinni tamakkiisumik innuttaasutut akuersaarnissaanut ukkassineq allanngortittariaqaripput.

Ataatsimoorussatsinni (ilinniagaqarneq suliffeqarneq aamma sunngiffimmi sammisaqarneq) peqataasinnaalernissaat anguniarlugu pisinnaasaat, nukii periarfissaallu aningaasaliiffigisariaqarivut.

Innarluutilinnut tunngassuteqartut aamma inuit innarluutillit aningaasaliiffigineqarnerinut akuersaarneq ileqqussatigut akisussaaffiinnaanngilaq, siunissamulli ungasinnerusumut aningaasaqarniarnikkut silatusaarneruvoq, taamaaliornikkut innuttaasut kalaallit inuiaqatigiinni peqataanissaanut tunniussisinnaanissaannullu periarfissiisinnaavoq.

Aningaasaliinermik ukkataqarneq iliuuseqarnissamut suleqatigiinnissamullu kajumissaarineruvoq – siullertut suleqatigiinneq inuit pineqartut ataatsimoorluni iliuuseqarfigilerlugit tassalu – inuit innarluutillit.

Aaqqiissutissatut siunnersuutit ilaat tassaavoq Aaqqissuussinermut aqqut ataaseq - aatsimik aqqutissaqartitsinermi siunertarineqarpoq nammineq susassaqarfiit kisiisa eqqarsaatigalugit suleriaaseqarnerup pisortaqarfiillu kisimik ikiorsiisuunissaasa unitsinneqarnissaa. Inuit nukittorsarneqassapput. Sipaarniarnerit innarluuteqarneq tassungaluunniit attuumassuteqartut ajornartorsiutaasut peerneq ajorpai, taamaattumik aningaasaliinermut ukkassisaqariaqarpugut– inuit innarluutillit aamma sullissineq sunniuteqarluartoq aningaasaliiffigisariaqarpoq.

Siullertut alloriarnerit tassaassapput sullissinermi sunniuteqarluartumut allannguutit ersarissut. Unammilligassagut amerlaqaat. Aaqqissuussinermut aqqut ataasiinnaasariaqaraluarpoq.

Aningaasaliinikkut, allannguinikkut sullissinermilu ajornartorsiutaasut aaqqivigineratigut inuiaqatigiinni ajornartorsiuterpassuit, ilaatigut pinngitsuuisinnaaneq, angerlarsimaffeqannginneq, imminut toquttarneq aaqqivigineqarsinnaapput. Innarluutillit pillugit iliuuseqannginneq iliuusaavoq akisunerpaaq.

Nielsip aamma Katriinap misigisimasai sakkortuut qinikkat attortiffigeqaat, aamma sullissinermi ajornartorsiuteqarnerup annertussusaa pillugu isumaqataapput tamatumani susassaqartut akimorlugit suleqateqarnissaq pisariaqarpoq – kommunit, borgmesterit Naalakkersuisullu akornanni. Inuit innarluutillit pillugit oqaaseqartartuattut iliuuseqarnissamut kajumissuseq pillugu nuannaarutigeqaara, tamannalu ataatsimut takutinneqarpoq. Tiliumit neriuuteqarluarpugut suleqatigiinnissalu qilanaaralugu.