Ukiortaami 2024-mi oqalugiaat

Asasakka tamassi!

 

2023 ukiumi aasit, ajornartorsiut imminiiginnarsinnaanngisarput ersersinneqarpoq. Kalaallit Nunaanni inuit innarluutillit pisinnaatitaaffitik unioqqutinneqartuartunik misigisaqartuarsinnarput. Tamanna piviusuuvoq, eqqumaffigisariaqangarput iliuuseqarfigisariaqangarpullu. Sulianik suliaqarnermi ajornartorsiutinik, ornitassanik tikikkuminartussaasunik  ilinniagaqarsinnaannginnermut, suliffiit aamma peqqissuseq, immikkoortitaaneq, pimmatigineqarneq aamma naapertuilluanngitsuliorfigitinneq – piffissanngorpoq ataatsimoorluta allannguinissatsinnut. 

 

Ukiortaami oqalugiaat una unammillernartunik eqikkaanerinnaanngilaq, iliuuseqarnissamulli nilliaataalluni. Aqqummi paarlaguffimmi isornartumiippugut, akisussaaffimmik tigusisariaqarluta kiisalu toqqaannartumik sunnerneqartut pillugit aaqqiissutinik pilersitseqatigissallugit – inuit innarluutillit taakkulu qanigisaat.

 

Siullertut piumasaqaataavoq, inuiaqatigiinni tamarmi eqqarsartaaserput allanngortissagipput, inuillu piginnaasakinnerusut inuiaqatigiinni peqataasutut naligalugillu isigissagigut. Kulturikkut allannguisariaqarpugut – ataatsimullu pingaartitat nassaareqqittariaqarpagut. Ataatama ungasinngitsumi Arsummi ilaquttami assitoqaa takutippaa – angut qisummik niuusalik, inuiaqatigiit ikiortigalugit qaannaminut ikisoq, matumuuna allat peqatigalugit piniarsinnaavoq.

 

Tiliup ukiumoortumik innuttaasunit saaffiginnissutinik misissuinerisa takutippai ilaatigut sulianik suliaqarnerit ingerlanneqartarnerisa, ilinniarnerup aamma psykiatriip iluani ilungersunartumik ajornartorsiuteqartoq. Innuttaasut inatsisitigut illersugaanerat ulorianartorsiortinneqarpoq, politikkikkut iliuuseqarfigisariaqarluni. Aaqqissugaaneq nukittunerusoq, ajornartorsiutit annikitsut, annertusinnginnerini aaqqiiviginnittussaq pisariaqartipparput. Tamanna inunnut ataasiakkaanut inuiaqatigiinnullu tamanut aalajangiisuussaaq.

 

Akuersaagassaanngilaq, inuit innarluutillit nakuusernermut aamma naapertuilluanngitsuliorfigitinnermut naammaginartumik illersugaannginnerat. Inuit naleqqusseruttorfimminni utoqqaat illuanni najugaqartinneqartarnerat. Meeqqat systemimik sumiginnarneqartut, pimmatigineqartut aamma immikkoortinneqartut kiisalu meeqqat atuarfianiilli tunniutiinnarfigineqareersut. Inuusuttut siullertut siusinaartumik suliunnaarnersiutisiaqarnissamut neqeroorfigineqartartut.

Namminersulivinneq aatsaat attanneqarsinnaavoq, kikkut tamarmik peqataatinneqarpata. Tamatta akisussaaffimmik tigusissaagut inuiaqatigiinnik, naqqanut qimatsinngitsunik imaluunniit nakkartitsiinnanngitsunik pilersitsiniarutta. Politikkikkut iliuuseqarnissaq, akimorluni suleqatigiinneq aamma iluaqutissanut aningaasaliineq, inuit innarluutillit takunngitsoorneqannginnissaannik qulakkeerinnittut. 

 

Aammali uanga illillu tungitsinnit iliuuseqartoqarnissaa pisariaqarpoq.

 

2024-mi Tiliup ukkatarissavai allannguut taanna pilersinnissaanut isiginniffiit aamma periarfissat nutaat. Taakku ilagaat ukiumoortumik isummersoqatigiinnerput, ukioq manna sammisaq taassaassaaq tamanut ilusilersuineq. Taaguut "Tamanut Ilusilersuineq" qulakkeerinnippoq, nioqqutit, avatangiisit, programmit aamma sullissinerit kikkunnut tamanut, piginnaasat imaluunniit killilersuutit apeqqutaatinnagit tikinneqarsinnaallutillu atorneqarsinnaanerat. Tamanna aamma aningaasaqarnermut nukittorsaataassaaq, takornariaqarnermi, utoqqarni aap tamatsinnut iluaqutissanik takkuttoqassammat.

Nerriviit qummoorlutillu ammoorsinnaasut aamma atuakkat immiussat assersuutaapput tamanut ilusilersukkanut. Tamanut ilusilersukkat inunni innarluutilinni aningaasaliinerinnaanngillat, kisianni inuiaqatigiit tamaasa isigalugit silatusaartumik aalajangiinerupput. Tamanut ilusilersukkat pillugit tunngaviit ilanngukkutsigit, inunnut innarluutilinnut avatangiisinik peqataatitsinerusunik taamaallaat pilersitsissanngilagut, kisianni inuiaqatigiinnik kikkunnut tamanut pitsaanerusunik pilersitsissalluta. Utoqqaat, takornariat, inuit nissumikkut napinikut imaluunniit inuit uippakajaarnermik eqqugaasimasut.

 

Inuiaqatigiinnut akisuvoq aaqqiissutissanut aningaasaliinnginneq. Inuit innarluutillit inuiaqatigiinni allat assigalugit iluaqutissanik periarfissanillu pissarsisinnaanngippata, tapiissuteqarnerit piginnaanillillu naleqarluinnartut annaassavagut. Inuit innarluutillit isiginnittaatsinik, piginnaasanik nutaaliornernillu assigiinngitsunik, inuiaqatigiinnut sorpassuartigut pisuunngortitsisunik tunniussaqarsinnaapput. Inunnik piginnaasakinnerusunik immikkoortitsinermit ullumikkut takusinnaasatsinnit peertariaqarpugut. 

 

Ullumikkut inissisimaffipput akueriinnarsinnaajunnaarparput. Ataatsimoorluta Kalaallit Nunaat, kimilluunniit ulorianartumut qimatsiviunngitsoq pilersitsigu. 2024 ukiuuli, iliuutsigut oqalunnitsinniit sunniuteqarnerusut.

 

Ukiortaami 2024-mi pilluaritsi!